Ang Pag-Binisaya Karong Panahona

August 29, 2015


Sa pila ka semana nakong wala pagsuwat og bag-ong entry ning akong blog, nakahunahuna ko nga mobalik sa akong namat-ang pinulongan. Unsa kaha kon magsuwat kog blog nga Binisaya ug dili na lang ipadayon ning akong nagkayuring nga Iningles?

Dili sayon ang paghimo og blog nga Binisaya. Basin nagyawyaw lang ko diri nga wala diay nagbasa. Pero nganong himoon man nakong problema ang akong magbabasa? Moabot ra man na sila kon gusto silang mobasa akong gipangsuwat.

Taudtaod na sad kong wala makasuwat ug makabasa sa Bisaya Magasin maong naughan na ang akong bokabularyo niining ako untang namat-an nga pinulongan. Wala na usab nako napadayon ang Balakista maong wala na gyod ko makabasa og mga bag-ong Binisaya nga sinuwat matag karon ug unya.

Naa ko karon sa panahon diin nasaag na kunohay ko sa dalan sa pag-Iningles.


Apan kiwaw ang akong pag-Iningles. Usa kini ka pinulongan nga langyaw sa akong diwa. Bisan matag karon ug unya makadungog kog Iningles, daw may mga panahon nga mosapid ang akong dila. Ganahan kong magsuwat og Binisaya. Isip usa ka Bisaya, gusto kong ipadayon ang akong pagsuwat og Binisaya.

Karong panahona, daghang mga bata ang naglisod unsaon paglitok og Binisaya nga dili konyo paminawon.


Bisan pa man sa pagpatuman sa mother tongue-based (MTB) nga edukasyon diha sa elementarya, daghan gihapon ang naglisod sa kaugalingong pinulongan sa Sugbo. Tingali kining mga bataa nga gipadako sa ilang kaugalingong panimalay sa Iningles nga pinulongan bugtong makadungog og Binisaya niining lawak-tunghaan lamang makadungog.

Unsay angay buhaton aron makat-on sa pag-Binisaya?


Basa og Bisaya Magasin. Wala nay lain pa, kining 85 anyos nga magasin nga karon gimantala sa Manila Bulletin ang usa sa mga Binisayang magasin nga nagpakita sa atong pagka-Bisaya. Mamahimo sab kaayo kang mobasa og mga lab-as nga balak sa Kabisdak. Matag karon ug unya, may bag-ong balak kang mabasa.

Ug, labaw sa tanan, suway og suwat-suwat og Binisaya aron imong mahibaw-an unsaon pagsuwat ang atong kaugalingong pinulongan. Sa kadakong wanang sa internet, nganong pipila lamang ang magsuwat og Binisaya?

Hala, kon may Bisaya kang blog o website diha, higala, i-comment na dayon diri aron daghan ang makahibawo!

You Might Also Like

0 comments

Leave a message below:

ABOUT

ZUProme Bisaya Logo

ZUProme Tech + Social Media blog by Rome Nicolas from Cebu, Philippines will tackle social media and technology updates for Filipinos.



LIKE US

AFFILIATION